الیکشن کمیشن نے الیکشن مینجمنٹ سسٹم کی تجرباتی مشق کامیابی سے مکمل کرلی
اسلام آباد: الیکشن کمیشن آف پاکستان (ای سی پی) نے الیکشن مینجمنٹ سسٹم (EMS) کے استعمال کی تجرباتی مشق کامیابی سے مکمل کرلی ہے۔
ملک بھر میں 859 مقامات پر قائم ریٹرننگ افسران کے دفاتر اس تجرباتی مشق میں شریک ہوئے۔ اس دوران فائبر/ڈی ایس ایل کنیکٹوٹی، ای ایم ایس ایپ لاگ ان، استعمال اور نتائج کی ترسیل و تدوین کے مراحل کی مکمل مشق کی گئی۔
تجرباتی مشق کے دوران ای ایم ایس کے ذریعے کامیابی سے پریذائیڈنگ آفیسرز کی جانب سے نتائج کی ترسیل اور ریٹرننگ آفیسرز کی جانب سے نتائج کی تدوین مکمل کی گئی۔
ای سی پی کے ترجمان کے مطابق، EMS کا بنیادی مقصد آر او کی سطح پر نتائج کی تدوین و ترتیب ہے۔ اس مشق کے دوران تمام آر اوز نے مکمل کامیابی کے ساتھ نتائج کی تدوین و ترتیب مکمل کی اور اس میں کسی قسم کی کوئی دقت نہیں ہوئی۔
مجموعی طور پر پریذائیڈنگ آفیسرز کی جانب سے نتائج کی ترسیل بھی تسلی بخش رہی۔ تاہم، مشق کے دوران چند مقامات پر کنیکٹوٹی کی دشواری کے باعث کچھ پریذائیڈنگ آفیسرز کو نتائج کی ترسیل میں معمولی چیلنجز بھی سامنے آئے۔ ان چیلنجز کو فوری طور پر دور کیا جا رہا ہے۔
ترجمان نے کہا کہ اگر کسی پریذائیڈنگ آفیسر کو اپنے موبائل فون کے ذریعے نتائج کی آر او تک ترسیل میں کوئی دشواری ہو تو وہ پریذائیڈنگ آفیسر انتخابی نتیجہ ذاتی طور پر آر او کے دفتر پہنچائے گا۔
