مسلم لیگ ن کا شہباز شریف کو وزیراعظم اور مریم نواز کو وزیر اعلیٰ پنجاب کے لیے نامزد کا پلان

اہور: مسلم لیگ ن کے قائد محمد نوازشریف کی زیرصدارت ملکی سیاسی صورتحال پر اعلیٰ سطح کا اجلاس ہوا۔ اجلاس میں پنجاب میں صوبائی حکومت بنانے کے لیے ابتدائی خدوخال تیار کیے گئے۔

اجلاس میں کچھ شرکاء نے شہباز شریف کو وزیر اعظم کے طور پر امیدوار نامزد کرنے کی تجویز دی، جبکہ باقی شرکاء نے مریم نواز کو وزیر اعلیٰ پنجاب بنانے کی تجویز کی حمایت کی۔

پارٹی قیادت نے مسلم لیگ ن کے وزارت عظمیٰ کے امیدوار کا فیصلہ شریف برادران پر چھوڑ دیا۔

وزیر اعلیٰ پنجاب کے لیے مریم نواز اب تک مضبوط امیدوار کے طور پر سامنے آئی ہیں۔ ان کے بطور وزیر اعلیٰ پنجاب نام پر پارٹی اجلاس میں مزید مشاورت جاری ہے۔

مسلم لیگ ن شہباز شریف اور مریم نواز کے نام اپنے ممکنہ اتحادیوں کے سامنے رکھے گی۔ پیپلز پارٹی، ایم کیو ایم، جمیعت علماء اسلام ف اور دیگر کی حمایت لینے کی کوشش کی جائے گی۔ حکومت سازی سے متعلق اپنی تجاویز اتحادیوں کے سامنے رکھ کر متفقہ فیصلے کرنے کی کوشش کی جائے گی۔ حتمی فیصلہ پاکستان پیپلزپارٹی کے ساتھ مذاکرات کے فائنل راؤنڈ کے بعد کیا جائے گا۔

اجلاس میں صدر مملکت اور چیئرمین سینیٹ کے عہدے اتحادیوں کو دینے جبکہ اسپیکر قومی و صوبائی اسمبلی مسلم لیگ ن کے پاس رکھنے کی تجاویز بھی سامنے آئیں۔