نئی قومی اسمبلی کا پہلا اجلاس 29 فروری کو ہونے کا امکان

اسلام آباد: نئی منتخب قومی اسمبلی کا پہلا اجلاس 29 فروری کو ہونے کا امکان ہے۔ ذرائع کے مطابق اس اجلاس کی صدارت اسپیکر راجہ پرویز اشرف کریں گے۔

اجلاس میں نئے منتخب ارکان حلف اٹھائیں گے۔ راجہ پرویز اشرف نئے منتخب ارکان سے حلف لیں گے۔ قانون کے تحت الیکشن کے بعد 14 روز کے اندر نئے منتخب ارکان کا نوٹیفکیشن جاری ہو گا۔

کامیابی کے نوٹفکیشن کے بعد خواتین کے لیے مخصوص 60 اور غیر مسلموں کے لیے مخصوص 10 نشستوں کی سیاسی جماعتوں کو الاٹمنٹ ہو گی۔ آزاد امیدواروں کو 3 دن کے اندر کسی پارٹی کو جوائن کرنے کی مہلت دی جائے گی۔

آئین کے آرٹیکل 91 کے تحت انتخابات کے بعد 21 روز کے اندر نئی قومی اسمبلی کا اجلاس بلایا جائے گا۔