وفاقی وزیر احد خان چیمہ سے ایشیائی ترقیاتی بینک کے صدر ماساتسوگو اساکاوا کی ملاقات، پاکستان کی ترقیاتی ترجیحات اور میکرو اکنامک اصلاحات پر گفتگو

ایشیائی ترقیاتی بینک (اے ڈی بی)کے صدر ماساتسوگو اساکاوا نے وفاقی وزیر برائے اقتصادی امور احد خان چیمہ سے ملاقات کی جس میں پاکستان کی ترقیاتی ترجیحات اور میکرو اکنامک اصلاحات پر تبادلہ خیال کیا گیا۔ صدر اے ڈی بی نے حکومت کی جانب سے جامع اصلاحات کے اقدام کو سراہا جن کی بدولت اقتصادی بحالی کے مثبت آثار ظاہر ہو رہے ہیں۔ انہوں نے پاکستان کی ترقی اور اصلاحاتی ایجنڈے کے لیےاے ڈی بی کی مسلسل حمایت کا اعادہ کیا۔اے ڈی بی کی طویل مدتی اور مستحکم حمایت کا اعتراف کرتے ہوئے وفاقی وزیر احد خان چیمہ نے صدر اے ڈی بی کو حکومت کی طرف سے متعارف کرائی گئی اصلاحات کی تفصیلات سے آگاہ کیا، اہم اصلاحات میں ٹیکس آمدنی میں اضافہ، توانائی کے شعبے کی مالیاتی پائیداری کو بہتر بنانا، غیر ہدف شدہ سبسڈیوں میں کمی اور سماجی تحفظ کے پروگراموں کو فروغ دینا شامل ہیں۔

وفاقی وزیر نے پاکستان کے سیلاب متاثرین کے لئے اے ڈی بی کی جانب سے 1.5 ارب ڈالر کی اعلان کردہ امداد کو بھی سراہا۔ صدر اے ڈی بی نے پاکستان کے اصلاحاتی ایجنڈے پر اعتماد کا اظہار کیا اور حکومت کی جانب سے میکرو اکنامک استحکام لانے کے لیے اٹھائے گئے مشکل اقدامات کی تعریف کی۔ صدر اے ڈی بی نے پاکستان کو پبلک پرائیویٹ پارٹنرشپ ، موسمیاتی اور قدرتی آفات سے بچائو، ملکی وسائل کی موبلائزیشن، خواتین کی مالی شمولیت اور توانائی کے شعبے کی اصلاحات میں مسلسل حمایت کی یقین دہانی کروائی۔

بعد ازاں، سیکرٹری وزارت اقتصادی امور کاظم نیاز اور صدر اساکاوا نے اسلام آباد میں ایشیائی ترقیاتی بینک کی نئی عمارت کے سنگ بنیاد کی تقریب میں شرکت کی۔ اس موقع پر سیکرٹری وزارت اقتصادی امور کاظم نیاز کا کہنا تھا کہ اسلام آباد میں اے ڈی بی کی نئی عمارت پاکستان اور اے ڈی بی کے درمیان 1966 سے قائم طویل مدتی اور معتبر شراکت داری کے ایک نئے باب کا آغاز ہے۔ انہوں نے کہا کہ اے ڈی بی کا اسلام آباد میں اپنی عمارت بنانے کا فیصلہ جو پورے علاقے میں ایشیائی ترقیاتی بینک کی چوتھی عمارت ہوگی، گہرے اور دیرپا تعاون کی مزید تصدیق ہے۔