وفاقی وزیر اطلاعات کا مولانا فضل الرحمان کی پریس کانفرنس پر ردعمل

اسلام آباد: وفاقی وزیر اطلاعات عطا اللہ تارڑ نے جے یو آئی کے سربراہ مولانا فضل الرحمان کی پریس کانفرنس پر ردعمل دیتے ہوئے کہا کہ مولانا فضل الرحمان ہمارے بزرگ اور قابل احترام سیاست دان ہیں۔

عطا اللہ تارڑ نے کہا کہ سیاست میں تمام مسائل کا حل صرف مذاکرات میں ہے اور موجودہ صورتحال میں بیان بازی کی بجائے پارلیمان میں سیاست ہونی چاہئے۔

انہوں نے مزید کہا کہ حکومت کی بہتر معاشی حکمت عملی سے ملکی سٹاک ایکسچینج تاریخی بلندی پر ہے جبکہ زرمبادلہ کے ذخائر میں اضافہ ہوا ہے۔ تجارتی خسارہ کم ہونے کے ساتھ ساتھ روپے کی قدر مستحکم ہونا خوش آئند ہے۔

وفاقی وزیر اطلاعات نے کہا کہ آئندہ انتخابات انشاءاللہ 2029 میں مقررہ وقت پر ہوں گے۔

عطا اللہ تارڑ نے مولانا فضل الرحمان سے مخاطب ہو کر کہا کہ آپ بزرگ اور زیرک سیاست دان ہونے کے ناطے حکومت کے معاشی بہتری کے اقدامات کو سراہنا چاہئے۔