اے ٹی سی نے توڑ پھوڑ کیس میں عمران خان کا 5 روزہ جسمانی ریمانڈ منظور کرلیا
اسلام آباد: راولپنڈی کی انسداد دہشت گردی کی عدالت (اے ٹی سی) نے 28 ستمبر کو توڑ پھوڑ کیس میں سابق وزیراعظم اور پاکستان تحریک انصاف (پی ٹی آئی) کے بانی عمران خان کا 5 روزہ جسمانی ریمانڈ منظور کرلیا۔
پولیس عمران سے اڈیالہ جیل میں پوچھ گچھ کرے گی۔
جج امجد علی شاہ نے کیس کی جیل میں سماعت کی، جہاں عمران خان کو عدالت میں پیش کیا گیا۔
راولپنڈی پولیس نے نیو ٹاؤن تھانے میں درج مقدمہ نمبر 2831 میں جسمانی ریمانڈ کی استدعا کی۔
استغاثہ کی جانب سے ظہیر شاہ نے ریمانڈ کے حق میں دلائل پیش کیے۔ عمران خان کی قانونی ٹیم نے درخواست کی مخالفت کی۔
عدالت نے دلائل مکمل ہونے کے بعد عمران خان کو 5 روزہ جسمانی ریمانڈ پر پولیس کی تحویل میں دے دیا۔
پی ٹی آئی کے بانی کو بدھ کے روز اسلام آباد ہائی کورٹ (IHC) کی جانب سے نئے توشہ خانہ کیس میں 10 لاکھ روپے کے دو ضمانتی مچلکوں کے عوض ان کی ضمانت منظور ہونے کے چند گھنٹوں بعد مذکورہ کیس میں گرفتار کیا گیا تھا ۔
